واسطة

كنت في مركز تسجيل السيّارات في ماريلاندز، وكان عليّ أن انتظر دوري، فجلست بقرب أحد المهاجرين اللبنانيين.. وكان الغضب بادياً على محيّاه لعدم تمكنّه من الحصول على دور له.. فإذا بالموظفّة تناديني لتخليص معاملاتي.. فجن جنون هذا المغترب وأخذ ينكعني بخاصرتي ويقول لي:
ـ شو باك .. أنا صرلي ساعه ناطر.. وانت بتفوت قبلي!
ـ يا خيّي أنا شو دخلني.. هيي نادتني
ـ مأكد لأنك حامل موبيل فون.. شو هالبلد؟.. هربنا من لبنان وقعنا هون!!
ـ يا خيي.. أنا ما خصّني روح سألهن..
ـ إنت شو إسمك؟
ـ حنّا..
ـ حنّا شو؟
ـ حنّا الماشي..
ـ لا تقلّلي إنّو بيّك إسمو ويسكي
ـ لأ .. هيدا إسم أمي .. بيّي إسمو ووكر
* في شي غلط .. في واسطة .. مش معقول..
ـ ليك.. انت معك نمره متل هالنمره؟
ـ لأ.. من وين منجيب هالنمره؟
ـ من حد الباب.. من هونيك.. روح سحاب نمره.. وبتصير واسطتك أقوى من واسطة رئيس الوزراء.
ـ معقول..
**